កណ្តាលៈ លោកឧកញ៉ាបណ្ឌិតគីម ហ៊ាងប្រធាន KW Cambodia និងជាអ្នកអភិវឌ្ឍន៍អចលនវត្ថុម្នាក់ បានចាប់ផ្តើមសាងសង់គំរោងថ្មី នៅក្នុងបុរីKS Residence ដែលជាផ្ទះមានតម្លៃសសមរម្យ។

លោកឧកញ៉ាបានមានប្រសាសន៍ឲ្យដឹង តាមបណ្តាញតេឡេក្រាមកាលពីថ្ងៃទី២៦ កញ្ញាថា នេះជាការសាងសង់សាកល្បង ជាមួយបរិមាណផ្ទះប្រមាណ២០០ល្វែង។ លោកបន្តថា ផ្ទះថ្មីនៅបុរីKS Resident មានតម្លៃ២ម៉ឺនដុល្លារ ដែលមានទំហំផ្ទះ៤២ម៉ត្រការ៉េ លើដី៦៧ម៉ែត្រការ៉េ និងមានគ្រឹះរ៉ឹងមាំ ដែលអាចសាងសង់បន្ថែមទៀតបាន។

លោកបញ្ជាក់ថា “ហេតុផលដែលខ្ញុំសាងសង់ផ្ទះ តម្លៃចាប់ពី២ម៉ឺនដុល្លារបែ​បនេះ ដោយសារមើលឃើញថា អ្នកធ្វើការងារឲ្យគេភាគច្រើន មិនមានលទ្ឋភាពទិញផ្ទះតម្លៃខ្ពស់ៗឡើយ”។​លោកបន្តថា “បើអ្នកធ្វើការមានប្រាក់ខែត្រឹម៥០០ដុល្លារ ពួកគេអាចបង់រំលស់ជាមួយធនាគារបាន បើពីរនាក់ប្តី ប្រពន្ឋធ្វើការ ប្រាក់ខែបូកបញ្ចូលគ្នាត្រឹម៥០០ ទៅ៦០០ដុល្លារ អាចបង់រំលស់ជាមួយធនាគារបានហើយ ដោយមួយខែពួកគេបង់ឲ្យធនាគារជាង២០០ដុល្លារប៉ុណ្ណោះ”។

គំរោងKS Residence ដំណាក់ទីពីរនេះ មានទីតាំងនៅកៀនស្វាយ ក្រោយវត្តដូនសរចម្ងាយ២០០​ម៉ែត្រ។

លោកឧកញ៉ាបានបន្តថា ផ្ទះរបស់KS Residence ដំណាក់កាលទី២ មានប្លង់រ៉ឹង ហេតុនេះ ពួកគេអាចយកប្លង់ទៅដាក់ធនាគារបាន ប្រសិនជាប្តី ប្រពន្ឋមានប្រាក់ខែបូកបញ្ចូលគ្នាត្រឹម៥០០ទៅ៦០០ដុល្លារ ដែលនេះជាការរួមចំណែកជាមួយ​រាជរដ្ឋាភិ​បាល ក្នុងការលើកកំពស់ការអភិវឌ្ឍលំនៅដ្ឋាន តម្លៃសមរម្យសម្រាប់ប្រជាជនកម្ពុជា៕